ХАМАС: Газада кризис жоюлса, дароо тынчтык сүйлөшүүлөрүнө кайтып келүүгө даярбыз

ХАМАС кыймылы Газа секторундагы оор гуманитардык кризис жоюлуп, жардам муктаж адамдарга жетсе, ок атышууну токтотуу боюнча сүйлөшүүлөргө дароо жана кайрадан катышууга даяр экенин билдирди. Бул тууралуу чет өлкөлүк басылмалар жазышты.

Уюм тараткан жазма билдирүүдө, ачарчылык менен жокчулук өкүм сүрүп турган шартта сүйлөшүү өткөрүүнүн мааниси жок экени белгиленген.

"Эгерде жардамдар Газадагы муктаждарга жеткирилип, тереңдеп бараткан гуманитардык кризис жана ачарчылык токтотулса, биз сүйлөшүүлөргө дароо кайтууга даярбыз",- деп жазылат билдирүүдө.

Ошондой эле эл аралык коомчулук жана бардык тиешелүү тараптар Израилдин Газадагы массалык кыргындарын токтотууга, азык-түлүк жана башка жардамды Газанын бардык аймактарына эч кандай чектөөсүз жана дароо жеткирүүгө, бул жардамдардын коопсуздугун камсыз кылууга тез арада чара көрүүгө чакырылды.

ХАМАС буга чейин да ок атышууну токтотуу жана кол салууларды токтотуу боюнча келишимге жетүү үчүн сүйлөшүүлөргө олуттуу катышып келгенин бир нече жолу белгилеген.

Бирок Израил өкмөтү, айрыкча премьер-министр Биньямин Нетаньяхунун жетекчилигиндеги бийлик, келишимге жетишүүгө тоскоол болууну улантып жатканы айтылууда.

Бул позицияга согушту токтотууга каршы чыгып, Газаны кайрадан толук басып алуу жана элди күч менен көчүрүп жиберүүнү жактаган оңчул коалиция мүчөлөрүнүн кысымы себеп болуп жатканы белгиленет.

Газадагы Саламаттыкты сактоо министрлигинин маалыматына ылайык, 2023-жылдын 7-октябрынан бери Израилдин кол салууларынан улам жетишсиз тамактануу жана ачарчылыктан каза тапкан палестиналыктардын саны кеминде 160ка жетти. Алардын 91и - балдар.

Жергиликтүү булактар Израил акыркы 5 айдан ашык убакыттан бери чек араларды жаап, ымыркайлар үчүн тамак, дары-дармек жана негизги азыктарды киргизүүгө жол бербей жатканын билдиришет.