Айгүл Жапарова Эверестти багындырган эки айымга, тоодо өз тиричилигин жүргүзүп жаткан аялдарга суктанды

Бүгүн, 1-августта өлкөнүн биринчи айымы Айгүл Жапарова Эверестти багындырган эки айымга сукатанганын жана тоолор адамга өзгөчө сезим тартуулай тургандыгын Фейсбук баракчасына жазып калтырды.

"Быйыл бир эмес, эки кыргызстандык айым дүйнөнүн эң бийик чокусу – Эверестти багындырышты. Мындай бийиктикке чыгуу – жөн гана жетишкендик эмес, бул күчтү, эркти жана ишенимди талап кылган чыныгы чакырык", - деди Жапарова

Ага улай биринчи айым тоого чыгуудагы сезимдер жана ал жакта өз тиричилигин өткөрүп жаткандарга суктануусун билдирди.

"Биз Эверестке чыккан жокпуз, бирок акыркы күндөрү Көл-Суу, Көл-Төр жана Соң-Көлгө барып келдик. Тоолорубуздун арасында болгон сайын мен табияттын күчүн гана эмес, жан дүйнөнүн толуктугун, шыктанууну сезем. Кыргызстандын аймагынын 94 пайызга жакынын тоолор ээлейт жана алар биздин иденттүүлүгүбүздүн ажырагыс бөлүгү. Кыргыз аялы катары мен бул байланышты өзгөчө сезем. Тоолор – бул жөн гана жаратылыш эмес, бул биздин күчүбүз. Ар бириңиздерди тоолорго бат-баттан барууга чакырам: алардын энергиясын сезип, асманды чагылдырган көлдөрдү көрүп, Кыргызстаныбыз кандай керемет экенин эсиңизге саласыз.

Ошондой эле ал жакта жашаган жана иштеген адамдар, өзгөчө биздин аялдар мени шыктандырат. Катаал климатка, бийиктикке, алыстыкка карабастан, алар күн сайын өз жерине укмуштуудай берилгендик, туруктуулук жана сүйүү менен эмгектенишет. Көл-Суу көлүнүн жээгинде өзүнүн боз үйүндө конокторду жан дили менен жана укмуштуудай жылуу маанайда тосуп алган Асел айым менен да кокусунан таанышканыма кубанычтамын",- деди Жапарова.