Португалия Палестина мамлекетин тааный турганын жарыялады

Португалия өкмөтү сентябрь айында Палестина мамлекетин расмий таануу ниети бар экенин жана бул боюнча керектүү жараяндарды баштай турганын билдирди. Бул тууралуу чет элдик басылмалар жазышты.

Өкмөттүн маалыматында, Нью-Йорк шаарында 28–30-июль күндөрү Бириккен улуттар уюмунун Башкы ассамблеясынын алкагында өткөн Палестина маселесине арналган жогорку деңгээлдеги эл аралык конференцияда Португалия башка өлкөлөр менен бирге Палестина мамлекетин таануу маселесин караганы айтылды.

Ошондой эле Португалия өкмөтү бул багытта башка бир катар өлкөлөр менен бир пикирде жана Палестина мамлекетин таанууга кызыкдар экенин белгиледи.

Мындан тышкары, Португалия бийлиги Палестина мамлекетин сентябрь айында өтө турган БУУнун Башкы ассамблеясында расмий таануу үчүн өлкө президенти жана парламенттеги саясий партиялар менен кеңешүүлөрдү баштай турганын кошумчалады.

Белгилей кетсек, буга чейин Франция, Улуу Британия, Канада жана Мальта да Палестина мамлекетин сентябрда тааный турганын билдиришкен.