"Крокустагы" терактка катыштыгы бар төрт адам күнөөсүн мойнуна алды

Кечээ, 4-августта “Крокус” концерт залындагы терактка катыштыгы бар төрт адам сотто күнөөсүн мойнуна алды. Бул тууралуу ТАСС агенттиги адвокатка шилтеме берип билдирди.

Сот отуруму Москва шаардык сотунун имараттарынын биринде өтүп жатат. Процесске 30дан ашуун жабырлануучу катышууда. Отурум ачык өтүүдө, бирок негизги бөлүгү жабык түрдө жүрүп жатат. Себеби иш материалдарында жашыруун маалыматтар жана буга чейин эл аралык издөөдө жүргөн адамдарды табууга тоскоол болчу маалыматтар камтылган.

ТАССтын маалыматына караганда, теракттан кийин жабыркагандардын дээрлик баары психологдорго кайрылышкан.

Эскерте кетсек, “Крокус Сити Холл” концерт залындагы теракт 2024-жылдын 22-мартында болгон. Тергөөнүн маалыматы боюнча, куралчан адамдар имаратка кирип, элге ок атышкан жана өрт коюшкан. Натыйжада 149 адам каза болуп, 180ден ашууну жаракат алган. Кол салуудан көп өтпөй бир нече шектүү кармалган, ал эми айрым шектүүлөргө эл аралык издөө жарыяланган.