Бишкекте кызды коркутуп, артынан кубалаган жигит кармалды (видео)

Кечээ, 4-августта Көк-Жар кичи районунда өтүп бара жаткан жарандарды коркуткан адам кармалды. Бул тууралуу Октябрь РИИБинин маалымат кызматынан билдиришти.

Аталган факт Бишкек шаарынын Октябрь РИИБиге катталып, тергөөгө чейинки текшерүү иштери башталган. Тиешелүү иш-чаралардын жүрүшүндө, милиция кызматкерлери тарабынан 2006-жылы туулган М.А. аттуу жаран кармалган. Ага Укук бузуулар жөнүндө кодекстин 126-беренесине(Майда бейбаштык) ылайык протокол түзүлүп, соттун чечими чыкканга чейин райондук башкармалыктын убактылуу камерасына камакка алынды.

Эске салсак, буга чейин социалдык баракчанын колдонуучуларынын бири 31-июлда болжол менен 22:30-23:00 чамасында үйгө кайтып келе жаткан учурда, окуяга туш болгонунун айтып, видео бөлүшкөн. Анда жумуштан келе жатканда алдынан бир жигит бактардын арасынан чыгып, аны кубалаган. Колунда бычак да бар экендиги айтылып, айланасын карап күлө баштаганы да белгиленген.