Украинадагы кризисти жөнгө салууда чечүүчү этап башталганы айтылды

Кытай Эл Республикасынын Тышкы иштер министри Ван И Украинадагы кризисти жөнгө салууда чечүүчү этап башталганын жарыялады. Бул тууралуу чет элдик басылмалар жазышты.

Министрдин айтымында, Москва менен Киевдин сүйлөшүүлөрдү башташы - бул кризисти чечүүгө карай маанилүү кадам болуп саналат. Бул тууралуу ал Бразилия президентинин башкы атайын кеңешчиси Селсу Аморим менен телефондон сүйлөшүү маалында билдирген. Сүйлөшүү учурунда тараптар Украинадагы кырдаалды да талкуулашкан.

"Орусия менен Украина сүйлөшүүлөрдү баштап, алдыга карай маанилүү кадам жасашты. Азыр бул процессти жөнгө салуу чечүүчү этапка өттү",- деп билдирген министр.

Ошондой эле Ван И Кытай менен Бразилиянын Украина кризисин саясий жол менен жөнгө салуу боюнча сунуш кылган 6 пункттан турган консенсусу чыңалууну азайтууга оң таасирин тийгизгенин белгилеген.

Кытай менен Бразилия 2024-жылдын май айында Украинадагы жаңжалды жөнгө салууга багытталган 6 пункттан турган планды биргелешип сунушташкан. Бул демилгени дүйнөнүн 100дөн ашык мамлекети колдогон. Анын негизинде Кытай, Бразилия жана Глобалдык Түштүккө кирген башка мамлекеттер Украинадагы жаңжалды чечүү үчүн "Тынчтыктын достору" деген ачык платформаны түзүшөрүн жарыялашкан.

Мындан тышкары, Орусия менен Украина Стамбул шаарында үч ирет түз сүйлөшүүлөрдү өткөрүшкөн. Жыйынтыгында туткундарды алмашуу жүрүп, Орусия Украина тарапка курман болгон аскерлердин сөөгүн өткөрүп берген. Ошондой эле, эки тарап тең жаңжалды жөнгө салуу боюнча меморандум долбоорлору менен алмашышкан.