Жалал-Абаддагы жер титирөө: Жарака кеткен объекттердин саны 14кө жетти

Жалал-Абад облусунда кечээ, 5-августта катталган жер титирөөдө жарака кеткен объекттердин саны 14тү түздү. Бул тууралуу бүгүн, 6-августта Өзгөчө кырдаалдар министрлигинен билдиришти.

Айтсак, Майлуу-Суу шаарында 1 социалдык объект, Сузак районунун Кыз-Көл айыл аймагында 2 социалдык объект, Базар-Коргон районунун Арстанбап-Ата айыл өкмөтүндө 8 турак жай жана 3 социалдык объекттин дубалдарында жаракалар пайда болгон.

Учурда жер-жерлерде Жарандык коргонуу кызматтары жана штаб тактоо жумуштарын улантууда.

Белгилей кетсек, 5-августта облус аймагында күчү 6 баллга жеткен жер титирөө катталган, силкинүүнүн очогу Майлуу-Суу шаарында 4,5 балл, Базар-Коргон районунун айрым айыл өкмөтөрүндө 4,5 балл, Жалал-Абад шаарында 3,5 баллга чейин сезилген.