Трамп Азербайжан жана Армения лидерлерин кабыл алууга даярданууда

АКШ президенти Дональд Трамптын Азербайжан президенти Илхам Алиев менен Армениянын премьер-министри Никол Пашинянды Ак үйдө кабыл алары күтүлүүдө. Бул тууралуу Армениянын өкмөттүк өкүлү Назели Багдасарян Facebook баракчасында билдирип, Пашинян 7-8-август күндөрү АКШга иш сапары менен барарын жарыялады.

Багдасаряндын айтымында, бул сапардын алкагында Пашинян Трамп жана Алиев менен жолугуп, аймактагы тынчтык, өнүгүү жана экономикалык кызматташтык маселелерин талкуулайт.

АКШ басма сөзү кабарлагандай, Трамптын жумалык иш тартибине ылайык, ал Алиев менен Пашинянды 8-август күнү кабыл алат.

Washington Post гезити маалымдагандай, бул жолугушуунун жүрүшүндө Азербайжан менен Армениянын ортосунда "мүмкүн болгон тынчтык келишими" жарыяланышы мүмкүн.

2020-жылдагы Экинчи Карабак согушунан кийин Азербайжандын демилгеси менен тынчтык сүйлөшүүлөрүн баштаган эки өлкө 2025-жылдын март айында келишимдин мазмуну боюнча өз ара макулдашууга жетишкен болчу.

Азербайжан тарап келишимге кол коюу үчүн Армениянын азыркы конституциясынан Азербайжандын аймактык бүтүндүгүнө шек келтирген жоболор алынышы керек экенин, ошондой эле иш жүзүндө актуалдуулугун жоготкон ЕККУнун Минск тобу жоюлушу зарылдыгын талап кылган.