Газада Израилдин чабуулунан улам палестиналык футболчу каза тапты

Палестинанын футбол боюнча улуттук курама командасынын мурдагы оюнчусу Сулейман Аль-Обейд Израилдин чабуулунуна улам 41 жашында каза болду. Бул тууралуу Палестинанын футбол ассоциациясынын басма сөз кызматы билдирди.

Маалыматка ылайык, Сулейман Аль-Обейд Газанын түштүгүндө гуманитардык жардам күтүп турган учурда көз жумган. Ошондой эле футболчудан тышкары дагы бир нече жай тургун жабыркаган.

Басма сөз кызматынын маалыматында, ал "палестиналык футболдун эң көрүнүктүү жылдыздарынын бири" катары сыпатталат. Өзүнүн карьерасынын ичинде Аль-Обейд Палестинанын жергиликтүү клубдарында ойногон жана улуттук курама команда үчүн 19 оюн өткөрүп, 2 гол киргизген.

Палестина футбол ассоциациясынын (PFA) маалыматына ылайык, 2023-жылдан 2025-жылдын ортосуна чейин Израилдин аскердик чабуулдарынан улам каза болгон палестиналык футболчулардын саны 200дөн ашкан.

2025-жылдын июнь айында дагы эки жаш палестиналык оюнчу, тагыраагы Мустафа Мета жана Абдулла Мазен Хавила Газада гуманитардык жардам алуу үчүн кезекте турган учурда Израилдин аткылоосунан улам курман болушканы кабарланган.