Ысык-Көлдө жол коопсуздугу күчөтүлгөн тартипте камсыздалууда (фото)

Жайкы туристтик сезон маалында жарандардын коопсуздугун камсыздоо жана жол кыймылынын тартибин сактоо максатында, Ысык-Көл ОИИБинин башчысы Мурат Бороновдун жетекчилиги алдында күчөтүлгөн тартипте кызмат өтөө чаралары көрүлүүдө. Бул тууралуу облустук милиция билдирди.

Ысык-Көл облусунун ЖКККБ кызматкерлери, ошондой эле Бишкек жана Ош ШИИБинин МККБ бөлүмдөрүнүн кызматкерлери менен биргеликте, курорттук аймактарда, эс алуу жайларында жана жол кыймылы жогору болгон тилкелерде күнү-түнү иш алып барууда.

Бул иш-чаранын алкагында Бостери айылында Subaru Forester автоунаасын текшерген учурда 23 400 сом айып пулу аныкталды.

Бишкек ШИИБ боюнча МККБнын кызматкерлери Subaru Forester үлгүсүндөгү автоунааны токтотуп текшеришкен. Текшерүүнүн жүрүшүндө унаанын айдоочусу ар кандай жол эрежелерин бузганы үчүн жалпы суммасы 23 400 сом болгон айып пулдары бар экени аныкталды.

Учурда унаа атайын токтотмо жайына токтотулуп, айдоочуга тиешелүү протокол түзүлүп, жол кыймылынын эрежелерин бузууга каршы көзөмөл күчөтүлдү. Ошондой эле туристтик агым көп болгон тилкелерде кошумча көзөмөл пункттары уюштурулуп, айдоочулар жана жөө жүргүнчүлөр менен түшүндүрүү иштери үзгүлтүксүз жүргүзүлүүдө.