Трамптын чабарманы Москвага кандай кабар менен келди?

Орусиянын президенти Владимир Путин менен АКШ президентинин атайын өкүлү Стивен Уиткофф Кремлдеги жолугушууда Украина кризисин жана эки өлкө ортосундагы стратегиялык кызматташтыктын өнүгүү мүмкүнчүлүктөрүн талкуулашты. Бул тууралуу 6-августта Путиндин жардамчысы Юрий Ушаков билдиргенин орусиялык басылмалар жазышууда.

Анын айтымында, сүйлөшүү абдан пайдалуу жана конструктивдүү мүнөздө өттү.

"Эгер темаларды атачу болсок, биринчи кезекте бул, албетте, Украина кризиси. Экинчи маселе — бул АКШ менен Орусиянын ортосундагы стратегиялык кызматташтыктын өнүгүү мүмкүнчүлүктөрү. Биз тараптан, айрыкча Украина маселеси боюнча, айрым маселелер айтылды жана аларга керектүү жооптор АКШ президенти Дональд Трамптан да алынды", — деди Ушаков журналисттерге.

Уиткофф бүгүн, 6-августта таң эрте Москвага келген. Кремлдин басма сөз кызматы Путин менен АКШ президентинин атайын өкүлүнүн жолугушуусу аяктаганын маалымдап, сүйлөшүү болжол менен үч саатка созулганын билдирди. Жолугушууга Орусиянын президентинин жардамчысы Юрий Ушаков да катышкан.