Трамп Путин менен жакында жолугушуусу мүмкүн экенин билдирди

АКШнын президенти Дональд Трамп жакынкы убакта Орусиянын президенти Владимир Путин менен Украинадагы согушту токтотуу маселесин талкуулоо үчүн жолугушуусу мүмкүн экенин билдирди. Бул тууралуу чет элдик басылмалар жазышты.

"Жолугушуу жакын арада болушу мүмкүн деген жакшы мүмкүнчүлүк бар",- деди Трамп.

Трамп ошондой эле Орусия менен АКШнын шаршемби күнү "жакшы сүйлөшүүлөрдү" өткөргөнүн айтты. Бирок ошол эле учурда, Москва менен соода кылган өнөктөштөргө карата кошумча санкциялар болушу да мүмкүн экенин четке каккан жок.

Буга чейин АКШнын мамлекеттик катчысы Марко Рубио эки өлкө лидерлеринин жолугушуусу үчүн "көптөгөн тоскоолдуктарды" жеңип өтүү керек экенин белгилеген.

"Бүгүн жакшы күн болду, бирок алдыда көп иш бар. Бизди дагы эле бир топ тоскоолдуктар күтүп турат. Алардан жакынкы күндөрдө өтүп кетүүгө үмүттөнөбүз",- деди Рубио Fox Business телеканалына берген маегинде.

АКШ президентинин администрациясы жолугушууга даярдык жүрүп жатканын тастыктады. Маалыматтарга караганда, Трамп Путин менен жолугушкандан кийин Украина президенти Владимир Зеленскийдин катышуусунда үч тараптуу жолугушуу өткөрүшү мүмкүн.

"Орусия тарап президент Трамп менен жолугушууга кызыкдар экенин билдирди, жана президент Путин менен да, Зеленский менен да жолугушууга даяр. Президент Трамп бул кандуу согуштун токтотулушун каалайт",- деди Ак үйдүн басма сөз катчысы Кэролайн Ливит.