Трамп: "Иран өзүнүн өзөктүк куралдарын калыбына келтирсе, АКШ кайра чабуул жасайт"

Эгер Иран өзүнүн өзөктүк потенциалын калыбына келтирүүгө аракет жасаса, АКШ кайрадан аскердик чара көрүшү мүмкүн. Бул тууралуу АКШнын президенти Дональд Трамп билдиргенин чет элдик басылмалар жазышты.

"Биз Иранга өзөктүк курал алууга мүмкүнчүлүк бербестен, Жакынкы Чыгыштагы согуштарды токтоттук",- деди Трамп.

Анын айтымында, эгер Иран баарын кайра баштай турган болсо, бул өтө кооптуу кадам болмокчу.

"Алар кайра баштай турган болсо, биз кайра кайтып келебиз. Менимче, алар муну түшүнүшөт",- деп кошумчалады Трамп.

Белгилей кетсек, 13-июнга караган түнү Израил Иранга каршы аскердик операция баштаган. АКШ да жаңжалга аралашып, Ирандын өзөктүк объекттерине сокку урган.

23-июнда Иран Катардагы АКШнын "Аль-Удейд" аскердик аба базасын ракета менен аткылаган. Бул окуядан кийин Дональд Трамп Израил менен Ирандын ортосунда ок атууну токтотуу тууралуу келишимге жетишилгенин жарыялап, 24-июнда тынчтык күчүнө киргенин билдирген.