Бишкекте пара берүүгө шектелип чет өлкөлүк жаран кармалды

Бишкекте милициянын кайгуул кызматынын башкармалыгынын тескөөчүсүнө пара берип жаткан жеринен чет өлкөлүк жаран кармалды. Бул тууралуу бүгүн, 7-августта Ички иштер министрлигинен билдиришти.

Маалым болгондой, 1-августта Бишкек шаарында KIA MORNING үлгүсүндөгү автоунаанын 2002-жылы туулган И.У.Х. аттуу айдоочусу транспорт каражатын мас абалында башкаргандыгы үчүн тиешелүү кызматкерлер тарабынан токтотулган. Ага карата тийиштүү протокол толтуруу менен унаасы айып короо жайына киргизилген.

Кийин айдоочунун таанышы ушул маселени чечүү максатында Бишкек ШИИББи боюнча МККБнын башка кызматкерине пара сунуштаган.

Бул факт боюнча Кылмыш-жаза кодексинин 345-беренеси (Пара берүү) менен кылмыш иши козголгон.

Кечээ, 6-август күнү тескөөчүгө айдоочунун таанышы болгон 2001-жылы туулган Б.М.Т. аттуу чет өлкөлүк жаран 10 миң сом пара берип жаткан жеринен кармалган. Чет өлкөлүк жаран камакка алынып, учурда тергөө амалдары жүргүзүлүүдө.