Иран: АКШ сүйлөшүү тууралуу кабар жөнөттү, жолугушуу кызыкчылыгыбызга жараша болот

Ирандын Тышкы иштер министри Аббас Аракчи АКШ тараптан сүйлөшүү сунушу түшкөнүн, бирок Тегеран азырынча бул маселе боюнча так чечим кабыл ала электигин айтты. Бул тууралуу чет элдик басылмалар жазышты.

"АКШ тараптан бизге айрым билдирүүлөр келди. Учурда алар бааланууда. Азырынча так чечим жок. Сүйлөшүүлөр өтөбү же жокпу - бул толугу менен биздин улуттук кызыкчылыктарыбыз эмнени талап кыларына жараша болот",- деди ал Иран мамлекеттик телеканалына берген маегинде.

Аракчи бул билдирүүнү Эл аралык атом энергиясы агенттигинин (МАГАТЭ) өкүлдөрү Тегеранга келерден бир нече күн мурун жасады.

Министрдин айтымында, акыркы өзгөрүүлөрдү жана Иран парламентинин чечимин эске алганда Иран менен МАГАТЭнин ортосунда "жаңы доор" башталышы керек.

МАГАТЭ сапары маалында ирандык өзөктүк объекттерге баруу каралбаганын, сүйлөшүүлөр боюнча акыркы чечимди Ирандын Улуттук коопсуздук жогорку кеңеши кабыл аларын айтты. Тышкы иштер министрлиги болсо ошол кеңештин чечимин ишке ашыруучу орган болуп саналат.