Axios: Израил Газаны толугу менен басып алуу чечимин чыгарды

Израил бийлиги Газа шаарын оккупациялоо чечимин кабыл алды. План болжол менен 10 саатка созулган кеңешмелерден кийин бекитилген жана бул чечим Газа секторунун толук оккупациясына алып келүүчү алгачкы кадам катары бааланууда. Бул тууралуу Axios агенттиги билдирди.

АКШнын президенти Дональд Трамп бул операцияга каршы эместиги айтылды.

Ошол эле учурда The Washington Post маалыматына ылайык, Израил армиясынын айрым жогорку жетекчилери мындай сценарийге каршы чыгышкан. Планга ылайык, операциянын жүрүшүндө 1 миллионго жакын тынч тургун башка жакка көчүрүлөт жана операция бир нече айга созулушу мүмкүн.

Буга чейин премьер-министр Биньямин Нетаньяху Израил Газа секторун аннекциялоону (толук кошуп алууну) көздөбөй турганын билдирген. Анын айтымында, Израилдин максаты ХАМАС кыймылын жок кылуу жана болжол менен 50 туткунду кайтаруу болуп саналат.

Нетаньяху белгилегендей, согуш аяктагандан кийин Газа аймагында "коопсуздук периметри" түзүлөт.