Данияда 15 жаштагы окуучу мектепке ок атууну пландаган деп кармалды

Даниянын түштүк-чыгышындагы Колдинг шаарында жеке мектепке карата куралдуу кол салуу жасоо планы бар деп шектелип 15 жаштагы бала кармалды. Бул тууралуу чет элдик басылмалар жазышты.

Полиция кол салууну үч окуучу биргеликте даярдаганын маалымдады. Калган эки шектүү суракка алынгандан кийин бошотулган.

Түштүк-чыгыш Жутланд районунун полициясы өткөн жума күнү Сент-Майклс аттуу жеке мектепке куралдуу кол салуу жасалары тууралуу кабар алынганын билдирди.

Колдингдеги бул мектеп өлкөдөгү жайкы каникул аяктаган учурда чабуулга алынышы пландалган.

Ыкчам кызматтар окуя ачыкка чыккандан кийин мектепте же аймакта коопсуздук коркунучу жок экенин белгилешти. Кол салуу пландалган мектепте окуучулардын коопсуздугу камсыздалганы белгиленди.

Адам өлтүрүүгө аракет кылуу айыбы менен каралып жаткан 15 жаштагы шектүү, прокуратуранын өтүнүчү менен сот тарабынан төрт жумага убактылуу камакка алынды.