Ошто Текебаевге, Чолпон Султанбековага таандык үйлөр бузулууда

Ош шаарындагы Алишер Навои эс алуу багындагы мыйзамсыз 11 курулуш имараты бузулууда. Бул тууралуу мэриянын басма сөз кызматы билдирди.

Маалыматка ылайык, мэрия эс алуу багындагы 11 коммерциялык курулуштардын жер аянттарын кайтарып алуу боюнча бардык соттук жараяндан утуп чыккан. Эскертүүлөргө карабастан курулуш ээлери имараттарды бузуп алуу иштерин жүргүзбөй келишкен. Алардын ичинен жетиси Ак-Буура дарыясынын корук аймагына курулуп калган.

Бүгүн, 8-августта муниципалдык менчик башкармалыгы аталган 11 имаратты бузуп алып салуу иштерин баштады. Менчик ээлеринин арасында бир катар мамлекеттик жана коомдук ишмерлердин да мүлктөрү бар. Арасында учурда Кыргызстандын Германиядагы элчиси Өмүрбек Текебаевдин бир тууганына, депутат Чолпон Султанбековага тиешелүү имараттар бар.