85 жаштагы карыя жубайы жана досунун жардамы менен Гиннестин рекорддор китебине кирди

Америкалык Роберт Сандерс 44 күндө 4 миң 800 чакырымды велосипед менен басып өтүп, Гиннес рекорддор китебине кирди. Бул тууралуу китептин басма сөз кызматы билдирди.

Маалыматка ылайык, 85 жаштагы Сандерс расмий түрдө 4 миң 839,3 чакырым велосипед айдап өткөн эң кары велосипедчи болуп таанылды. Буга чейинки рекорд 78 жаштагы америкалык Брюс Клоссерге таандык болчу.

44 күндүк сапарында саякатчы Калифорниядан Флоридага чейин барып, мейманканаларда, хостелдерде же түз эле аны коштоп жүргөн унаанын ичинде түнөгөн. Унааны жубайы Кэтрин жана көп жылдан берки досу Жек Хокер айдашкан. Алар сапардын бүтүндөй жүрүшүндө Сандерсти шыктандырып турушкан.

"Адегенде Жек, анан Кэтрин. Алар болбосо бул мүмкүн эмес эле",- деп айтты Роберт сапардын соңунда.