Бишкекте милиция кызматкерине пара берген жактоочу кармалды (видео)

Бишкекте тергөөчүгө пара берүүгө шектүү жаран кармалды. Бул тууралуу бүгүн, 9-августта Свердлов РИИБинин басма сөз кызматы билдирди.

Маалым болгондой, Свердлов РИИБинин жетекчилигине билдирме менен Свердлов РИИБинин Тергөө кызматынын тергөөчүсү кайрылган. Анда А.С. аттуу жарандын үстүнөн алдамчылык фактысы боюнча жүргүзүп жаткан кылмыш ишин бурмалап, кылмыш жоопкерчиликтен бошотуп берүү максатында Л.С. аттуу жактоочу пара сунуштаган.

Пара сунуштоо фактысы менен 1-август күнү Кылмыш-жаза кодексинин 345 -беренесине (Пара берүү) ылайык кылмыш иши козголгон.

7-август күнү 1962-жылы туулган Л.С. аттуу жактоочу Бишкек шаарынын Тергөө кызматынын бөлүмүнүн иш бөлмөсүндө 144 миң акча берип жаткан жеринен кармалган.

Мындан тышкары алдамчылык фактысы боюнча жогоруда көрсөтүлгөн А.С. аттуу жаран 96-беренеге ылайык Бишкек ШИИББинин убактылуу кармоочу жайына камакка алынды.

Тергөө амалдары уланууда.