Бразилияда завод жарылып, 9 адам каза болду

Бразилиянын Парана штатындагы жарылуучу заттарды өндүрүүчү заводдо жарылуу болуп, тогуз адам каза болду. Бул тууралуу штаттын губернатору Ратиньо Жуниор билдирди.

"Мен Куатру-Баррас шаарында болгон жарылуудан тогуз адамдын көз жумушуна терең кайгырып жатам",- деп жазды ал социалдык тармактагы X баракчасына.

Губернатор окуяга байланыштуу кайгыруусун билдирип, кырсык себептери азыр иликтенип жатканын маалымдады.

Agencia Brasil агенттигинин маалыматына караганда, жарылууда дагы жети жумушчу жаракат алган, бирок дарыгерлердин көзөмөлүнөн өткөндөн кийин үйлөрүнө жиберилген.