Шамал энергетикасы. "Росатом" менен Кыргызстандын "Жашыл энергетика" фонду келишимге кол коюшту

Бүгүн, 14-августта Ысык-Көл облусунда өткөн VII Кыргыз-орус экономикалык форумунун алкагында, "Росатом" корпорациясынын курамына кирген "НоваВинд Кыргызстан" жоопкерчилиги чектелген коому менен министрлер кабинетинин алдындагы "Жашыл энергетика" фонду электр энергиясын сатып алуу тууралуу келишимге кол коюшту.

Бул келишимге фонддун директору Эмилбек Орозбаев жана "НоваВинд Кыргызстан" ЖЧКсынын башкы директору Дмитрий Андреев кол койду.

"Бул келишим “Росатом” тарабынан Кыргызстанда курула турган биринчи шамал электр станциясынын долбоорунун алкагында ишке ашууда. “Росатом” бул тармакта долбоорлоо, куруу жана иштетүү боюнча толук циклде иш алып баруучу компания. Биз ишенебиз, жаңылануучу энергия булактарын колдонуу Кыргызстан энергетикасынын туруктуу өнүгүшүнө, жаңы жумуш орундарынын түзүлүшүнө, экономикалык өсүшкө жана инфратүзүмдү өнүктүрүүгө өбөлгө түзөт. Өкмөттүн (Фонддун өкүлчүлүгү аркылуу) кепилдиктери бул тармакка инвестиция тартууга ыңгайлуу шарт түзөт",- деди Дмитрий Андреев.

Өз кезегинде Эмилбек Орозбаев фонд жаңылануучу энергетика долбоорлорун өнүктүрүү максатында түзүлгөндүгүн белгиледи.

"Кыргызстан күн жана шамал сыяктуу табигый ресурстарга бай өлкө. Бул потенциалды элдин жыргалчылыгы үчүн колдонушубуз керек. Биз мындай долбоорлорду ишке ашырууга даяр болгон инвесторлорго толук колдоо көрсөтүүгө даярбыз жана натыйжалуу кызматташууга кызыктарбыз",- деди Орозбаев.

Маалымат үчүн:

• “Росатом” - Орусиянын мамлекеттик атомдук корпорациясы, анын “Росатом Возобновляемая энергия” бөлүмү шамал энергетикасы боюнча долбоорлорду интеграциялап, долбоорлоо, куруу жана тейлөө иштерин толук аткарат.

• “Росатом” буга чейин Орусиянын түштүгүндө 1035 мегаватт кубаттуулуктагы тогуз шамал электр станциясын ишке киргизген. 2028-жылга чейин бул көрсөткүчтү 2 гигаватттан ашыруу пландалууда.

• Кыргызстанда курула турган шамал станциясы Ысык-Көл облусунда 100 мегаватт кубаттуулукта болот. Курулушу 2026-жылы башталат.

• Март 2024-жылы Кыргызстандын Энергетика министрлиги менен “Росатом Возобновляемая энергия” 1 гигаваттка чейин жаңылануучу энергия объектилерин куруу боюнча инвестициялык долбоорду ишке ашыруу тууралуу макулдашууга кол коюшкан.

• Ошондой эле, Орусия менен Кыргызстан атом энергетикасынын чакан долбоорлорун ишке ашыруу, кадрларды даярдоо жана онкология тармагында атом технологияларын колдонуу боюнча кызматташууда.