Трамп Аляскадагы саммит ийгиликсиз өтсө, санкцияларды киргизе турганын айтты

АКШ президенти Дональд Трамп Аляскада Орусиянын президенти Владимир Путин менен болгон жолугушуусу натыйжа бербесе, санкцияларды киргизүүгө даяр экенин билдирди. Бул тууралуу чет элдик басылмалар жазышты.

"Анын кесепеттери абдан олуттуу болот", — деди Трамп.

Америкалык лидер келерки саммиттин ийгиликсиз болуу мүмкүнчүлүгүн 25 пайыз деп баалады.

Мындан мурда АКШнын мамлекеттик катчысы Марко Рубио Вашингтон Украинанын аймагында тынчтык орнотуу үчүн бардык аракеттерди жасай турганын убада кылган.

Эске салсак, эртең,15-августта Алясканын аймагында АКШ президенти Дональд Трамп менен Орусия президенти Владимир Путиндин жолугушуусу өтөт. Бул 1988-жылдан берки АКШ менен Орусия президенттеринин Америкада өтө турган алгачкы жолугушуусу болот. Жолугушууда аймактарды алмашуу жана Киевдин НАТОго кирүүдөн баш тартуусу тууралуу талкуу болушу мүмкүн.