Эки-Нарындагы кулаган көпүрө: Айдоочунун сөөгү табылды 

Нарын районундагы Эки-Нарын айылынына алып өтүүчү көпүрө урап, Нарын дарыясына кулаган жүк ташуучу унаанын айдоочусунун сөөгү табылды. Бул тууралуу Ички ишетр министрлиги билдирди.

Маалыматка ылайык, бүгүн, 15-августта 41 жаштагы жарандын жансыз денеси Нарын облусунун Ак-Кыя аймагынан милиция кызматкерлери тарабынан табылган.

Учурда тиешелүү тергөө иштери жүрүүдө.

Эске салсак, 13-августта Эки-Нарын айлынын Нарын шаары жана башка аймактар менен байланыштырып турган көпүрө кулаган. SUPER.KG порталынын "Элдик кабар" бөлүмүнө аталган айылдын тургундары Нарын дарыясынан алып өтчү көпүрө кулаганын билдиришкен.

Жергиликтүү тургундар көпүрөгө көп жыл болгонун, эскилиги жетип авариялык абалда турганын айтышып, көпүрө мектептин курулушуна арматура жеткизүүгө бара жаткан жүк ташуучу унаа өтүп бара жатканда кулаганын белгилешкен.
Алар убагында тургундардын кайрылуусуна карабай жергиликтүү бийлик тарабынан көпүрөнү оңдоо иштери жүргүзүлбөй келгенин айтышкан.