Таласта кызмат адамынан опузалап акча талап кылган жаран кармалды

Таласта кызмат адамынан опузалап акча талап кылган жаран кармалды. Бул тууралуу бүгүн, 15-августта Талас ОИИБинин басма сөз кызматы SUPER.KG порталына билдирди.

Маалым болгондой, милицияга Бакай-Ата районунун 61 жаштагы тургуну арыз менен кайрылган. Анда Чолпонбай аттуу жаран шериктери менен арыз ээси кызматта турган учурда, кызматтан кетирүү максатында куру дооматтарды коомчулукка таратып, резонанс жаратуу менен коркуткандыгы белгилүү болду. Арыз ээсинен системалык түрдө опузалап акча каражаттарын талап кылып, ал кызматтан кетүүгө аргасыз болгон.

Бул факт боюнча Кылмыш-жаза кодексинин 208-беренеси (Опузалап талап кылуу) менен катталып, кылмыш иши козголду. Натыйжада Бакай-Ата районунун тургуну 1975-ж.т. Р.А. кармалып, Талас райондук соту тарабынан баш коргоо чарасы каралып, камакка алуу бөгөт чарасы тандалган.

Тергөө амалдарынын жүрүшүндө Р.А. арыз ээсинен 300 миң сом опузалап 100 миң сом алгандыгы жана бир нече кыймылдардын, коомдук фонддордун мүчөсү болгондугу аныкталган.

Милиция шектүүдөн жабыркагандар 0501 71 71 20 номерине кайрылса боло тургандыгын билдирди. Учурда тергөө амалдары жүрүп жатат.