Чанаккале шаарында чыккан ири токой өртүнөн улам 5 айылдын тургундары эвакуацияланды (видео)

Түркиянын түндүк-батышындагы Чанаккале провинциясынын Гелиболу районунда токой өртү чыгып, анын кесепетинен беш айылда алдын ала эвакуация жүргүзүлдү.

Turkey Today басылмасынын маалыматына караганда, өрт жергиликтүү убакыт боюнча саат 16:28де, айылга жакын токой зонасында башталган. Өрттүн себеби азырынча аныктала элек.

Чанаккале губернаторунун администрациясынын билдирүүсүнө ылайык, өрттү өчүрүү иштерине абадан 12 учак жана 12 тик учак тартылган.

Өрт менен күрөшүүгө жеринен 94 өрт өчүрүүчү унаа, 6 муниципалдык өрт өчүрүүчү унаа, 3 бульдозер жана 560 адамдан турган кызматкерлер тобу тартылды.

Операция Өзгөчө кырдаалдар жана табигый кырсыктардын кесепеттерин жоюу башкармалыгы, Аймактык токой чарба башкармалыгы, жандармерия, полиция жана башка тиешелүү мекемелердин координациясы менен жүргүзүлүүдө.