"Кыргыз–Россия" экономикалык форумунда БАПБдын санариптик чечимдери сунушталды

13–14-август күндөрү Ысык-Көлдүн жээгинде Кыргыз-Россия өнүктүрүү фондунун уюштуруусу менен VII Кыргыз-Россия экономикалык форуму болуп өттү.

Ага миңден ашуун мамлекеттик органдардын өкүлдөрү, ишкерлер, илимпоздор жана эксперттер катышты. Форумдун борбордук темасы "Санариптик суверенитет – экономикалык өсүштүн кыймылдаткычы" болду.

"Санариптик каржылык чечимдер – ылдам экономикалык өсүштүн куралы" аттуу сессияда «Банктар аралык Процессинг Борбору» ЖАКтын башкармалыгынын төрагасы Алтымыш Туратбеков сөз сүйлөп, компаниянын алдыдагы пландары жана жаңы каржылык инструменттердин натыйжалуулугун белгиледи:

"Биз үчүн артыкчылыктуу багыт – улуттук төлөм системасы "Элкарт" менен ELQR өз ара аракеттенүү операторун өнүктүрүү. Жыйынтыктар туура багыт тандагандыгыбызды көрсөтүүдө: 2025-жылдын биринчи жарым жылдыгында эле БАПБдын продуктулары аркылуу 65 миллиондон ашык операция жүргүзүлдү. Бул жарандар санариптик чечимдерге барган сайын активдүү өтүп жатканын далилдейт", — деди Туратбеков.

Форумда "Элкарт" улуттук төлөм системасынын стенди борбордук аянтчалардын бири болуп, анда NFC шакектер, билериктер, стикерлер жана өлкөнүн каржы рыногун бириктирген бирдиктүү QR-код ELQR сунушталды. Бул чечимдер ЕАЭБ өлкөлөрүнүн делегацияларынын, ЖМК өкүлдөрүнүн жана ишкерлердин өзгөчө көңүлүн бурду.

Катышуучулардын кызыгуусу компания тандап алган стратегиялык курстун тууралыгын дагы бир ирет тастыктап, Кыргызстандын санариптик экономикасын өнүктүрүүдөгү маанилүү салымын көрсөттү.

Ал эми «Банктар аралык Процессинг Борбору» келечекте да санариптик кызматтарды кеңейтүүнү улантып, күнүмдүк эсептешүүлөрдү ыңгайлуу кылуу жана ишкердик үчүн жаңы мүмкүнчүлүктөрдү ачуу ниетин билдирди.