Айыл чарба министрлиги УКМК кармаган кызматкерлери тууралуу үн катты

Бүгүн, 20-августта Cуу ресурстары, айыл чарба жана кайра иштетүү өнөр жайы министрлигинин кызматкерлери Улуттук коопсуздук мамлекеттик комитети тарабынан кармалгындыгы боюнча учурда тергөө иштери жүрүп жаткандыгын билдирди.

"Азырынча тергөөнүн кызыкчылыгын эске алуу менен жагдайларды ачыктоо мүмкүн эмес. Бирок, ошол эле учурда министрликтин кызматкерлери аларга ыйгарылган мыйзамдуу укуктук милдеттерин так жана кынтыксыз аткарууга дайым аракеттерин көрүп келет жана мындан ары да андай аракеттер көрүлө бермекчи. Ал эми дал ушул жагдай боюнча бардыгы тергөөнүн жыйынтыгы менен белгилүү болот жана министрлик ал жыйынтыктар менен сөзсүз түрдө өз убагында коомчулукту кабардар кылып турмакчы",- деп белгиленген маалымтта.

Буга чейин УКМК этти экспорттоого тыюу салган чечимге каршы аракеттерин көргөн айыл чарба министринин орун басары баш болгон 4 чиновникти кармагандыгы боюнча маалымат берген.