Баштан өткөн 20 күндүк кулчулук. Шоумен Актан Рыскелдиев "Качкын" тасмасынын жаралышына токтолду

"Казакстанга барып 20 күн иштеп келип, кийин гана кулчулукка кабылганымды сездим" деген шоумен, актёр, тамада Актан Рыскелдиев агынан жарылып, SUPER.KG порталына маек берди.

Анын айтымында, бул баштан өткөн окуя "Качкын" тасмасынын өзөгүн түздү. Ал Казакстанга таякеси менен барып, Кордайдан анча алыс эмес аймакта курулушта иштеген. Паспортторун да курулуш ээси жүйөлүү себептер менен алып койгон. 20 күндөн кийин тамак-аштын тартыштыгы, жасалган орой мамиле аны мекенге кайтууга аргасыз кылган.

"Башында жакшы эле аке-үкө мамиледе болгон. Аягында бизге кыйкыра баштады. Буйрук бере баштады. Андай мамиле менин мүнөзүмө жакпайт. Бетине айтып салам баарын. Таякеме, үй ээсине эмне кылсаңар да кетем дедим. Уулу экөөбүздү качырмай болду. Бирок үй ээси паспорттубузду берип, айтылган суммадан анча аз акчасын карматты. Анан кечке маал чек арага барып, сууну жиреп өтүп кеттик. Андан өткөндө эле таякемдин уулу качтык деди, 3 чакырым чуркап барып анан кийиндик. Асфальт жолго чыгып, маршрутканы көргөндө көздөн жаш келди.

Казакстанда иштеп келдим деп жүрүп, кийин унутуп деле калгам. Бирок Дастан баарын жүрөгүнө туюп калыптыр. Кийин ошонун негизинде тасма тартылды",- деди Рыскелдиев.

Качкын тасмасы эл аралык сынактарга катышып, бир топ наамдарды алууга жетишти. Тасмада баңги сатуучулар Аза менен Самат кокустан кулчулуктан качып келген Назик аттуу жаш кызга жолугуп калышат. Ал кылмышкердин колуна түшүп, кайрадан туткунга түшүп калуу коркунучуна кабылганда, Аза аны кандай болбосун сактап калууну чечет. Тасманын режиссёру Актан Рыскелдиевдин бир тууган агасы Дастан Жапар Рыскелди.