Министр Кулбаев: "Кыргыз-казак ортосундагы соода көлөмү өсүп жатат"

Ынтымак Ордодо бүгүн, 22-августта Казакстандын президенти Касым-Жомарт Токаевдин расмий сапарынын убагында жетинчи мамлекет аралык жогорку жыйын болуп өттү. Анда бир катар кызматташтык тууралуу келишимдерге кол коюлду.

Жыйындан кийин тышкы иштер министри Жээнбек Кулбаев сүйлөшүү жогорку деңгээлде өткөнүн белгиледи.

"Жыйында биз эки мамлекеттин ортосундагы соода-экономиканы өстүрүү, энергетика, транзиттик мүмкүнчүлүктөрүн жогорулатуу, айыл чарба тармагында кызматташуу, санариптештирүү, билим, маданият тармагы боюнча ой алмаштык. Сүйлөшүү эң жогорку деңгээлде өттү.

Азыркы шартта кыргыз-казак ортосундагы соода көлөмү өсүп жатат. 8 айдын ичинде 500 миллиондун тегерегинде соода болду, жылдын аягына чейин 1 миллиарддан жогору кылганга мүмкүнчүлүк болот.

Соода-саттыкты өнүктүрүү боюнча эки мамлекеттин ортосундагы чек ара көзөмөлүндөгү транзиттик мүмкүнчүлүктөрдү кеңейтүү боюнча да кенен ой алмаштык.

Андан сырткары, бардык министрликтерге тапшырмалар берилди",- деди ал.

Эске салсак, кечээ, 21-августта Токаев Бишкекке келип, аны Кыргызстандын президенти Садыр Жапаров тосуп алган.