АКШ президенти Украинадагы абалды жөнгө салуу кырдаалы эки жумада айкын болорун айтты

АКШнын президенти Дональд Трамп Украинадагы абалды жөнгө салуунун келечеги эки жумадан кийин айкын болорун билдирди.

"Көрөбүз. Менимче, эки жумадан кийин биз окуялар кандай болорун билебиз", - деди ал Ак үйдө.

Ошондой эле Трамп Орусиянын президенти Владимир Путин менен болгон мамилеси тууралуу айтып жатып, орус лидери 2026-жылы өтүүчү футбол боюнча Дүйнө чемпиондугунда АКШга келерине үмүттөнөрүн айтты.

"Владимир Путин эмне болуп жатканына жараша келет деп ишенем. Жакынкы бир-эки жумада бизде көп нерсе болот", - деди АКШ президенти журналисттерге Путин менен жолугушуудан чогуу тартылган сүрөттү көрсөтүп.