Африка өлкөлөрү дүйнөнүн картасын өзгөртүүнү талап кылышты

Африка Биримдиги учурда көп колдонулган дүйнөнүн картасы Африканын чыныгы көлөмүн бурмалап көрсөтөрүн айтып, аны колдонбоого чакырды. Бул тууралуу чет элдик басылмалар жазышты.

Бул карта XVI кылымда европалык картограф Герард Меркатор тарабынан түзүлгөн жана негизинен деңизде багыт алуу үчүн колдонулган. Бирок ал континенттердин реалдуу өлчөмдөрүн туура чагылдырбайт. Алсак, Түндүк Америка менен Гренландия өтө чоң көрүнүп, ал эми Африка жана Түштүк Америка абдан кичирейип көрсөтүлөт.

Reuters агенттигине берген билдирүүсүндө, биримдиктин өкүлү Сельма Малика Хаддади азыркы колдонулуп жаткан карта Африканы экинчи даражадагы аймактай көрсөтүп жатканын белгиледи.

Анын айтымында, мындай стереотиптер билим берүү тармагына, маалымат каражаттарына жана саясатка терс таасирин тийгизет, чындыгында Африка — дүйнөдөгү экинчи ири континент жана калкы 1 миллиарддан ашат.

Ошондуктан Африка Биримдиги эл аралык уюмдарга жана башка өлкөлөргө Африканын жана башка континенттердин чыныгы өлчөмүн так көрсөткөн карталарды гана колдонууну сунуштоодо.