Кара-Сууда Алымбек датка жана Курманжан датканын күмбөзү оңдоп-түзөөдөн өткөрүлөт

Ош облусунун Кара-Суу районунда жайгашкан Сары мазар көрүстөнүндөгү Алымбек датка менен Курманжан датканын күмбөзү толук оңдоп-түзөөдөн өткөрүлөт. Бул тууралуу бүгүн, 26-июлда облустук өкүлчүлүктөн билдиришти.

Облус башчысы Элчибек Жантаев Датка айыл аймагындагы тарыхый жайга барды. Ошондой эле ал көрүстөндүн кире беришин иретке келтирүү, оңдоп-түзөө жана жаңы арка куруу боюнча жергиликтүү бийликке тапшырма берди.

Белгилей кетсек, 11-12-сентябрь күндөрү Алай районунда Алымбек датканын 225 жылдык мааракеси белгиленет. Мааракеге байланыштуу зыярат кылуучулардын саны көбөйүшү күтүлүп жаткандыктан, мазардын инфраструктурасын жакшыртуу - тарыхый мурастарды урматтоонун маанилүү кадамы катары белгиленди.