Маданият министрлиги тарабынан мамлекетке 27 миллион сомдон ашык зыян келтирилгени аныкталды

Президенттин фондунан Маданият, маалымат, спорт жана жаштар саясаты министрлигине бөлүнгөн 300 миллион сомдун сарпталышынын мыйзамдуулугу текшерилди. Бул тууралуу Башкы прокуратура билдирди.

Маалыматка ылайык, текшерүүнүн жыйынтыгында 7,6 миллион сом акча каражаты министрлик тарабынан максатсыз жумшалгандыгы, Дене тарбия жана спорт департаменти тарабынан мониторинг жүргүзүлбөй 6,2 миллион сомдук спорт шаймандары кымбат баада алынгандыгы, министрликке караштуу "Кыргыз Маданият Сервис" мамлекеттик ишканасы тарабынан фонддун эсебинен сатылып алынган 13,2 миллион сомдук материалдык баалуулуктар жана техникалык жабдуулар негизсиз жок кылынгандыгы аныкталган.

Натыйжада мамлекетке жалпы 27 миллион 127 миң 820 сом зыян келтирилген. Бул факт боюнча Кылмыш-жаза кодексинин 336-беренеси (Коррупция) менен кылмыш иши козголуп, учурда тергөө иштери уланууда.