Дагестанда футболчулар жер титирөө убагында оюнду токтотушкан эмес

Интернет желесинде Дагестандын футболчулары жер титирөөгө карабастан оюнду улантышканы тартылган видео тарап жатат.

Сейсмологиялык борборунун (EMSC) маалыматы боюнча, Орусиянын жээгинде, Каспий деңизинин аймагында күчү 6 баллга жеткен жер титирөө болду. Жер титирөө Москва убактысы боюнча 23:33тө Дагестандын Дербент шаарынан 41 чакырым түндүк-батышта катталган.

Ошол эле учурда футболчулардын турнири жабык аянтчалардын биринде өтүп жаткан. Жергиликтүү "Магма" жана "Азерпетрол" командалары беттешкен.

Беттештин трансляциясы Магма чабуулга өткөн учурда футболчулардын бири силкинүүлөрдөн улам тең салмактуулукту жоготуп, чөпкө кулап түшкөнүн көрсөттү.

Комментатордун "жер титирөө" деп кыйкырганына карабай, оюнчулар оюнду уланткан. Оюн тең чыгуу менен аяктаган.