92 жаштагы италиялык атлет төрт жолу дүйнөлүк рекорд койду

92 жаштагы италиялык аял төрт жолу дүйнөлүк рекорд койду. Бул тууралуу чет элдик басылмалар жазышты.

Италиялык Эмма Мария Мацзенга өзүнүн жаш курактык категориясында бир нече дүйнөлүк рекорд койгон жеңил атлет. The Washington Post басылмасынын маалыматына караганда, анын кардиореспиратордук чыдамкайлыгы 50 жаштагы адамдыкына тете, ал эми булчуңдарындагы митохондриялар 20 жаштагы адамдыкындай иштейт.

Италия жана АКШнын изилдөөчүлөрүнүн айтымында, мындай таасирдүү жетишкендиктерге Мацзенга активдүү жашоо образын кармануунун натыйжасында жетишкен. Ал жеңил атлетика менен 19 жашында машыга баштаган, 28 жашында спорттон кеткен, бирок 53 жашында кайрадан чуркай баштаган.

Бүгүнкү күндө Эмма күнүнө эки же үч жолу чуркайт, калган убакта сейилдейт. Ал 90 жаштан жогорку курактагы аялдар арасында 200 метрлик жарышта дүйнөлүк рекордду орноткон. Эмма бул аралыкты 50,47 секундда басып өткөн.