Кытайда мурдагы аткаминер пара алганы үчүн өлүм жазасына тартылды

Кытайда мурдагы аткаминер 316 миллион юань (тактап айтканда, болжол менен 45 миллион доллар) пара алганы үчүн өлүм жазасына тартылды. Бул тууралуу чет элдик басылмалар жазышты.

Кытайдын Борбордук телеберүүсү (CCTV) кабарлагандай, Хайнань провинциясынын Элдик жыйындын туруктуу комитетинин мурдагы орун басары Лю Синтай 316 миллион юандан ашык пара алууга айыпталды.

Гуйлинь шаарынын соту белгилегендей, 2003-жылдан 2024-жылга чейин Лю Шаньдун жана Хайнань провинцияларында жооптуу кызматтарды ээлеп жүрүп, коммерциялык структураларга жана жеке адамдарга мамлекеттик контракттарды алуу, бизнес маселелери жана акча каражаттарын бөлүштүрүүдө мыйзамсыз жардам көрсөтүп келген.

Сот өкүмүндө Лю Синтайдын кылмыштары мамлекеттик кызыкчылыктарга олуттуу зыян келтиргени белгиленет. Айыпталуучу күнөөсүн чын ыклас менен моюнга алып, тергөөчүлөр менен активдүү кызматташканы жана зыянды ыктыярдуу түрдө толук кайтарып бергени үчүн сот аны өлүм жазасына үч жылдык кечиктирүү менен тартууга өкүм чыгарды. Ошондой эле мүлкүн толук конфискациялоо тууралуу чечим чыкты.