Жеңиш чокусунда калган Наговицынаны куткаруу үчүн канча каражат керектелет? Адистин жообу

Жеңиш чокусунда калган орусиялык альпинист Наталья Наговицынаны куткаруу операциясына болжол менен 100 миң долларга жакын каражат кетиши мүмкүн. Бул тууралуу Орусиянын альпинизм инструкторлорунун борбордук мектебинин мугалими жана куткаруучу Денис Киселев билдирди. Анын айтымында, мурда айтылган 60 миң доллар минималдуу баа болушу мүмкүн.

Киселевдин түшүндүрмөсү боюнча, бир вертолетту колдонуу болжол менен 20 миң доллар турат. Мындан тышкары, буга чейин бир учак кырсыкка учураган.

"Ар бир мүнөт сайын чыгымдар көбөйүп жатат. Эгер азыркыга чейин сарпталган акча каражаттарды жана күчтөрдү, анын ичинде вертолеттун зыяндарын эсептеп көрсөк, болжол менен 100 миң доллар чыгат",- деди адис.

Мындан сырткары, ал белгилегендей, альпинизм сезону аяктап калгандыктан, Жеңиш чокусуна жолду камсыз кылган бардык компаниялар лагерлерин жаап башташы керек. Бирок алар Наговицынаны куткаруу операциясы үчүн ошол жерде кармалып турушат.

Киселев белгилегендей, Наталья Наговицынанын тоого чыгууда алган камсыздандыруу полиси 35 миң долларды түзөт. Бул сумма адатта эвакуация үчүн жетиштүү болот. Калган чыгымдарды мамлекет төлөп бериши мүмкүн.

Адис мындай кырдаалдар сейрек эмес экенин, бирок бардык жабыркаган альпинисттерге тиешелүү эмес экенин белгиледи.

"Мисалы, бир нече жыл мурун Пакистандан орусиялык альпинист Александр Гуков тик учак менен эвакуацияланган. Ошондо пакистандык учкучтар Орусиянын мамлекеттик сыйлыктарын алышкан. Бул өтө маанилүү",- деди альпинизм инструкторлорунун борбордук мектебинин мугалими.

Эске салсак, 47 жаштагы Наталья Наговицына 12-августта Жеңиш чокусунан түшүп келе жатып бутун сындырып алган. Ал 7 миң метрден жогорку бийиктикте, тамак-ашсыз жана жалгыз калган.

Куткаруучулар бир нече жолу жетүүгө аракет кылышкан, бирок 23-августта катаал аба ырайынан улам операция токтотулган.

26-августта Орусиянын Тергөө комитетинин төрагасы Александр Бастрыкин Кыргызстандагы Жеңиш чокусунда жаракат алып, калып калган орусиялык альпинист Наталья Наговицынаны куткаруу боюнча бардык чараларды көрүүнү тапшырган.

Буга чейин альпинисттин уулу Михаил Наговицын Тергөө комитетинин төрагасына, Башкы прокурорго жана Орусиянын ТИМине кайрылып, апасына жардам берүүнү суранган. Ал билдиргендей, апасы менен байланыш үзүлгөндөн кийин бир жума өткөндө, видео аркылуу анын тирүү экендиги, кол булгалап, дагы деле күчүн сактап жатканы көрүнгөн.

Кечээ, 27-августта Наталья Наговицынанын турун уюштурган "Ак-Сай Трэвел" туристтик компаниясы окуя боюнча билдирүү жасап, быйыл август айында Жеңиш чокусунда Борбордук Азия тарыхындагы эң татаал куткаруу операцияларынын бири жүргүзүлгөнүн билдирди.

Ошондой эле Ички иштер министрлигинин Тергөө кызматы орусиялык альпинист учураган өзгөчө кырдаалдагы кырсык боюнча тергөөгө чейинки текшерүү жүргүзүлүп жатканын, чокуга чыгууну ишке ашырган туристтик компанияга да юридикалык баа бериле турганын маалымдады.