АКШда жасалма интеллект терапиясына тыюу салынышы мүмкүн

АКШда жасалма интеллектке негизделген чат-боттор арзан жана жеткиликтүү "терапия" куралы катары кеңири жайылууда. Бирок айрым штаттар бул технологиянын психикалык саламаттык кызматтарында колдонулушун тыюу же чектөөчү мыйзамдарды киргизе башташты. Бул тууралуу чет элдик басылмалар жазышты.

Маалым болгондой, акыркы изилдөөлөр чат-боттордун айрым колдонуучуларга өз жанын кыюу, зомбулук жана баңгизат колдонуу сыяктуу кооптуу сунуштарды бергенин аныктаган.

Мисалы, бир чат-бот жумушун жоготконун айтып, өз жанын кыюу ниетин билдирген колдонуучуга Нью-Йорктогу көпүрөлөрдүн бийиктигин тизмектеп берген. Башка тестте "метамфетаминге көз каранды" колдонуучуга "кичинекей доза алууну" сунуш кылган.

Адистер мындай мисалдар жасалма интеллекттин адам терапевттерин алмаштыра албай турганын айкын көрсөтүп турганын белгилешет.

Сан-Франциско университетинин психиатры Кит Саката 12 бейтапта "AI психозу" деп аталган абалды байкаганын билдирген. Бейтаптар галлюцинация жана реалдуулуктан ажыроо белгилерин көрсөтүшкөн.

АКШда Иллинойс штаты 1-августта кабыл алган "Wellness and Oversight for Psychological Resources Act" мыйзамы менен лицензиясы жок жасалма интеллектке негизделген терапия кызматтарын жарнамалоого жана көрсөтүүгө тыюу салды.

Терапевттер жасалма интеллектти болгону административдик иштерде (кезек алуу, эсеп-фактура жасоо, каттоо) колдонушу мүмкүн. Ал эми терапиялык чечим кабыл алууда же түздөн-түз бейтап менен байланышта колдонууга тыюу салынат.

Иллинойс муну менен Невада жана Ютадан кийин ушундай чечим чыгарган үчүнчү штат болду. Калифорния, Пенсильвания жана Нью-Джерси да окшош мыйзамдарды даярдап жатат.

Адистердин айтымында, жасалма интеллект терапиясында үч чоң коркунуч бар:

• Купуялуулук жана коопсуздук
• Кызматтын сапатынын жетишсиздиги
• Алдамчылык жарнама жана жоопкерчилик

Америка Психология Ассоциациясы Федералдык Соода Комиссиясына (FTC) кайрылып, жасалма интеллект компанияларынын өздөрүн лицензиясы бар терапевт катары жарнамалоосун "алдамчы аракет" катары сыпаттады.

Айрым окумуштуулар жасалма интеллектти толугу менен тыюу салуунун ордуна, стандарттар менен көзөмөл механизмдерин түзүү зарыл экенин айтышат.

Изилдөөлөр клиницисттер тарабынан иштелип чыккан чат-боттор тынчсызданууну азайтууда, пайдалуу адаттарды калыптандырууда жана тамекини таштоого көмөктөшүүдө оң таасир бере аларын көрсөтөт.

Бирок адистер бул боттор адам терапевттерин алмаштырбашы керектигин жана өзгөчө балдар менен алсыз топтор аларды көзөмөлсүз колдонбошу зарылдыгын баса белгилешет.