Орусияда батут кулап кетип, 5 жаштагы кыз оор абалда

Орусиянын Уфа шаарында катуу шамалдан улам батут кулап кеткен. Анын кесепетинен беш жашар кыз жабыркап, абалы оор. Бул тууралуу чет элдик басылмалар жазышты.

Маалыматтарга караганда, беш жашар кыз учурда жандандыруу бөлүмүндө. Дагы эки кыз ооруканага жаткырылган.

Жергиликтүү тургундар батут орнотууга жооптуулар жабыркаган балдарга эч кандай жардам көрсөтпөгөнүн, аларды ата-энелери өздөрү сактап калганын айтышууда. Аттракциондун ээлери окуя болгондон кийин дароо дайынсыз болуп, андан бери окуя болгон жерге көрүнбөй калган.

Окуяга күбө болгондор ошондой эле батут талаптагыдай бекитилбегенин, аны менен кошо жакын жерде турган күркө да жарылып кеткенин айтышууда.

Бул факт боюнча Орусиянын Кылмыш-жаза кодексинин 238-беренесинин 1-бөлүгү (коопсуздук талаптарына жооп бербеген кызматтарды көрсөтүү) менен кылмыш иши козголду. Прокуратуранын маалыматы боюнча, батут мыйзамсыз орнотулган.