Аргентинанын президентине шайлоо алдындагы иш-чарада таш ыргытышты

Аргентина президенти Хавьер Милей La Libertad Avanza ("Эркиндик чабуулда") партиясынын Ломас-де-Самора шаарында өткөн шайлоо алдындагы иш-чара учурунда эвакуацияланды. Буга белгисиз адамдардын анын кортежине таш жана башка буюмдарды ыргытуусу себеп болду. Бул тууралуу La Nacion гезити жазды.

Окуя Иполито Иригойен проспекти менен Лаприда көчөсүнүн кесилишинде болгон. Президенттин унаасында анын карындашы Карина Милей, депутаттыкка талапкер Хосе Луис Эсперт жана саясий технология боюнча кеңешчи Себастьян Пареха да болгон.

Маалыматка караганда, коопсуздук кызматкерлеринин көрсөтмөсү менен айдоочу унаанын ылдамдыгын күчөтүп, президентти чабуул болгон аймактан чыгарып кеткен. Андан соң партиянын тарапташтары менен оппоненттердин ортосунда кагылышуулар башталып, бир нече адам жабыркаган.

Аргентинада парламенттин жарымын жана сенаттын үчтөн бирин кайра шайлоо быйыл октябрь айында өтөт.

TN телеканалы кабарлагандай, президенттин басма сөз катчысы Мануэль Адорни жана коопсуздук министри Патриция Буллрич чабуул үчүн мурдагы президент Кристина Киршнердин тарапташтарын айыпташты.

Окуядан кийин LLA партиясынын өкүлдөрү мындай чабуулдар алардын саясий багытын өзгөртпөй турганын билдиришти.