Зеленский: "Орусиянын Украинага жасаган соккусун Трампка жасалган сокку деп эсептейм"

Украинанын президенти Владимир Зеленский кечээ, 28-августта кайрылуу жасап, Орусиянын Украинага жасаган соккусун Европага жана Трампка жасалган сокку деп эсептей турганын билдирди.

28-августка караган түнү Орусиянын Украинага жасаган чабуулунан 21 адам каза болгон.

"Бул чабуул Орусиянын максаттары өзгөрбөгөнүн так көрсөтүп турат. Алар согуш жүргүзүүнү каалашат жана биздин адамдарга гана эмес, шаарларыбызга, бүткүл дүйнөдөгү тынчтыкты көздөгөндөргө каршы чабуул жасап жатышат",- деди Зеленский өзүнүн кечки кайрылуусунда.

"Бул - Украинага каршы сокку. Бул - Европага каршы сокку. Ошондой эле бул Орусиянын президентинин Трампка жана башка дүйнөлүк лидерлерге каршы соккусу",- деп белгиледи украин президенти.

"Вашингтондо Путин согушту токтотууга даяр, лидерлер деңгээлинде жолугушууга жана негизги маселелерди чечүүгө макул деген сөздөр айтылды. Бирок ал тынчтыкка карай реалдуу кадамдардын ордуна баллистикалык ракеталарды тандайт. Балдар өлүп жатат, ал эми Путин тынчтык качан жана кандай жол менен болот деп сүйлөшүүдөн баш тартып жатат. Маселе - ал убада берген лидерлерге да эч коркпой ушундайча сокку ура алат",- деп сөзүн жыйынтыктады Зеленский.