Трамп администрациясы чет өлкөлүк студенттерге 4 жылдык чектөө киргизүүнү сунуштады

АКШ президенти Дональд Трамптын администрациясы чет өлкөлүк студенттердин өлкөдө калуу мөөнөтүн чектөөнү көздөгөн жаңы жобо долбоорун жарыялады. Бул тууралуу чет өлкөлүк басылмалар жазышты.

Учурдагы тартипке ылайык, чет өлкөлүк студенттер F визасы менен окуусу аяктаганга чейин чектөөсүз АКШда кала алышчу. Жаңы тартип боюнча бул мөөнөт окуу программасынын узактыгын ашпаган шартта эң көп дегенде 4 жыл менен чектелмекчи.

Окуусун аяктаган студенттер өлкөдө калуу үчүн визалык статусун жаңылашы же 60 күн ичинде чыгып кетиши талап кылынат.

Бул жобо студенттерди гана эмес, маданий алмашуу программасына катышкандарды жана чет өлкөлүк медиа өкүлдөрүн да камтыйт. Чет элдик журналисттердин АКШда калуу мөөнөтү эң көп дегенде 240 күн болот, ошол эле мөөнөткө узартуу сураса болот.

"Мурдагы администрациялар чет өлкөлүк студенттерге жана башка виза ээлерине дээрлик мөөнөтсүз калуу укугун беришкен. Бул коопсуздукка коркунуч туудурду, салык төлөөчүлөргө кошумча жүк жаратты жана америкалык жарандарды теңсиз абалга калтырды",- деди АКШнын Ички коопсуздук министрлигинин өкүлү.

Анын айтымында, жаңы тартип "мыйзам бузуу фактыларын алдын алып", өкмөттүн чет өлкөлүк студенттерди көзөмөлдөшүн жеңилдетет.

Акыркы айларда АКШнын Мамлекеттик департаменти студенттик визаларга болгон көзөмөлдү да күчөттү. Быйыл эле 6 миңден ашуун студенттик виза жокко чыгарылган.

Департаменттин маалыматына караганда, алардын көбү визанын мөөнөтү бүткөндөн кийин өлкөдө калуу, кол салуу, уурдоо, мас абалда унаа айдоо жана террорчулукка колдоо көрсөтүү айыптары менен байланыштуу болгон.

Өткөн жылга салыштырмалуу жокко чыгарылган визалардын саны болжол менен төрт эсе өскөнү кабарланды. Ошондой эле июнь айында АКШнын тышкы өкүлчүлүктөрүнө берилген көрсөтмөдө, студенттик виза берүүдө "америкалык элге, маданиятка, өкмөткө, мекемелерге же негизги принциптерге каршы көз караш" дагы баалоо критерийи катары каралары белгиленген.

Жаңы жобо күчүнө кирсе, АКШда окуп жаткан ондогон миң чет өлкөлүк студенттердин визалык статусунда олуттуу өзгөрүүлөр болот.