Казакстандын "Кайрат" клубу Алматыда "Реал Мадрид" менен оюн өткөрөт

Кечээ, 28-августта Монакодо 2025/26-жылдагы Чемпиондор Лигасынын жалпы этабынын чүчү кулак тартуу аземи болуп өттү.

Маалым болгондой, негизги баскычта казакстандык "Кайрат" клубу сегиз оюн өткөрөт. Казакстан испаниялык "Реал Марид", бельгиялык "Брюгге", грециялык "Олимпиакос" жана кипрдик "Пафос" клубдары менен беттешти Алматыда өткөрсө, италиялык "Интер", англиялык "Арсенал", португалиялык "Спортинг" жана Даниянын "Копенгаген" клубдары менен боло турган беттештерин башка өлкөдө өткөрөт.

Эске салсак, Казакстандын "Кайрат" клубу УЕФА Чемпиондор Лигасынын 2025/2026-жылкы сезондогу плей-офф баскычында Шотландиянын атактуу "Селтик" командасын утуп, бул турнирдин негизги этабына тарыхта биринчи жолу жолдомо алган.

"Кайрат" клубу "Селтикти" жеңүү менен УЕФАнын байге фондунан кеминде 18 миллион 620 миң евро же 11,7 миллиард теңге каражат утуп алган. Мындан тышкары, негизги этаптагы ар бир утуш үчүн 2,1 миллион евро, тең чыгуу үчүн 750 миң евро кошумча сыйлык берилет. Эске салсак, казакстандык командалардын жылдык бюджети көбүнчө 4 миллиард теңгеден ашпайт.

Эми быйыл күзүндө башталып, 2026-жылдын кыш мезгилине чейин созула турган негизги этапта Казакстандын "Кайраты" Европанын эң күчтүү клубдары менен сегиз жолу оюн талаасына чыгат.