Баткенде карантиндик продукцияны алып кирүүдө көзөмөл күчөтүлдү

Баткенде карантиндик продукцияны алып кирүүдө көзөмөл күчөтүлдү. Бул тууралуу Айыл чарба министрлиги билдирди.

Маалыматка ылайык, Ветеринардык жана фитосанитардык көзөмөл кызматынын Ош шаары жана Ош облусу боюнча аймактык башкармалыгы Баткен облусунун бир катар райондорунда мониторинг жүргүздү. Иш-чаранын максаты — өлкө аймагына алып келинген подкарантиндик продукцияга (көчөттөргө, үрөндөргө ж.б) фитосанитардык көзөмөлдү күчөтүү болду.

Мониторингдин алкагында аймактагы базарлар, күнөсканалар жана көчөт өстүрүү чарбалары текшерилди. Ошондой эле жергиликтүү калкка үрөн жана көчөт материалдарын мыйзамсыз алып кирүүгө тыюу салынаары боюнча түшүндүрүлдү. Мыйзамсыз ташылып келген продукциялар экологияга жана айыл чарбасына зыян келтирип, карантиндик зыянкечтердин жайылышына шарт түзөрү белгиленди.

Мындан тышкары, инспекторлор Кадамжай, Кызыл-Кыя, Достук автоунаа өткөрүү пункттарын, ошондой эле Баткен облусунун анклавдарына жакын жайгашкан "Чечме" (Сох) жана "Ак-Кыя" (Шахимардан) постторун текшеришти. Бул жерлерде Кыргызстандын аймагына киргизилип жаткан подкарантиндик продукцияны көзөмөлдөөнү күчөтүү боюнча сунуштар берилди.

Ветеринардык жана фитосанитардык көзөмөл кызматы өлкөнүн фитосанитардык коопсуздугун камсыз кылуу жана карантиндик объектилердин сырттан алып келүүгө жол бербөө багытындагы иштерди мындан ары да пландуу улантат.