Кар үстүндө сынган буту менен жылмайып отурган... Наговицынанын акыркы сүрөтү жарыяланды

Жеңиш чокусунда калган Наговицынанын акыркы сүрөтү Орусиянын маалымат каражаттарында жарыяланды. Кадрда Натальяны сынган буту менен кар үстүндө жылмайып отурган абалда көрүүгө болот. Жанында болсо аны куткарууга аракет кылып жатканда үшүккө урунуп, мээсине шишик кетип, оор азапта каза болгон италиялык альпинист Лука Синигилья болгон.

Германиялык альпинист Гюнтер Зигмунд Известия гезитине берген маегинде, каза болгон Лука менен чогуу Натальяга бир нече күнгө жетчү азык-түлүк калтырып кеткенин айтты. Бирок анын айтымында, учурда чокуда аба ырайынын начардыгынан абдан оор кырдаал түзүлгөн.

Эске салсак, 47 жаштагы Наталья Наговицына 12-августта Жеңиш чокусунан түшүп келе жатып бутун сындырып алган. Ал 7 миң метрден жогорку бийиктикте, тамак-ашсыз жана жалгыз калган.

Куткаруучулар бир нече жолу жетүүгө аракет кылышкан, бирок 23-августта катаал аба ырайынан улам операция токтотулган.