Садыр Жапаров ТИМдин Ош, Жалал-Абад, Баткен облустарындагы өкүлчүлүгүнүн жаңы имаратын ачты

Бүгүн, 29-августта Садыр Жапаров Ош облусуна жумушчу сапарынын алкагында Тышкы иштер министрлигинин Ош, Жалал-Абад жана Баткен облустарындагы Ыйгарым укуктуу өкүлчүлүгүнүн административдик имаратынын жана Кабыл алуу үйүнүн ачылыш салтанатына катышты. Бул тууралуу президенттин басма сөз кызматынан билдирди.

"Негизги имараттын жана кошумча корпустун курулушу толук аяктаган. Жаңы комплексте 120 орундуу чоң жыйын залы, бир нече ар түрдүү форматтагы жолугушуулар залдары, ресторан-банкет залы, кызматкерлердин иш бөлмөлөрү, ошондой эле жарандарды тейлөө үчүн консулдук борбор каралган. Бүгүнкү күндө имарат эмеректер менен 90 пайызга жабдылган, жабдууну аяктоо жакынкы убактарга пландалууда", - деп белгиленген маалыматта.

Садыр Жапаров жаңы комплекстин иш бөлмөлөрүн жана имараттарын көрүп, кызматкерлер үчүн түзүлгөн шарттар жана өкүлчүлүктүн инфраструктурасы менен таанышып чыкты.

Ал кыдыруунун жыйынтыгы боюнча Тышкы иштер министрлигине жана башка жооптуу мамлекеттик органдарга өкүлчүлүктүн натыйжалуу ишин камсыздоону, жарандарды сапаттуу тейлөөнү жөнгө салууну жана өлкөнүн түштүк аймагында эл аралык иш-чараларды өткөрүү үчүн комплекстин мүмкүнчүлүктөрүн максималдуу түрдө пайдаланууну тапшырды.