Ырчы Улукманапо бала бакчадагы күзөтчүнү сабап салгандыгы айтылууда

Кыргызстандын белгилүү рэп ырчысы Улукманапо 65 жаштагы бала бакчадагы күзөтчүнү сабап салгандыгын жергиликтүү басылмалар кабарлашууда.

Ал эми Бишкектин милициясы окуяны тастыктап, төмөнкүлөрдү билдирди.

Ленин РИИБине 1960-жылы туулган күзөтчү Б.Д. аттуу жаран арыз менен кайрылды. Окуя кечээ, 28-август күнү саат 16:30 чамасында Фрунзе көчөсүндө жайгашкан балдар бакчанын биринде болгон. Алын ала маалыматтар боюнча, эки жаштагы баланын атасы, 1992-жылы туулган жаран У.О. менен күзөтчүнүн ортосунда жаңжал чыккан. Окуя баланын бакчанын аймагына чуркап кирип, артынан атасы киргенден кийин башталган.

Күзөтчү атага эскертүү берип, эгерде бала ооруп калса, жугуштуу инфекцияны башка балдарга өткөрүп алышы мүмкүн экенин түшүндүргөн. Ошондон кийин алардын ортосунда уруш чыгып, анын жүрүшүндө баланын атасы күзөтчүнү урган.

Бул факты Жоруктарды каттоо автоматташтырылган системасына катталды. Азыркы тапта текшерүү иштери жүрүп жатат. Соттук-медициналык экспертиза дайындалды. Анын жыйынтыгына жараша процессуалдык чечимдер кабыл алынат.