Ош "өхх" деп... Жапаров, Ташиев, Токторбаев унаа менен Ошту кыдырышты (видео)

Бүгүн, 29-августта президент Садыр Жапаров Ош облусуна болгон иш сапарынын алкагында УКМК төрагасы Камчыбек Ташиев жана Ош шаарынын мэри Жеңишбек Токторбаев менен биргеликте Ош шаарын унаа менен кыдырып, жолдордун салынышы менен таанышты.

Видеодо Ташиев унаа башкарып, Оштун мэри президентке ар бир аткарылып, түртүлүп, тазаланып жаткан жерлер боюнча айтып жатканын байкоого болот.

Садыр Жапаров шаардагы аткарылган иштерди көрүп, мэрди алкады.

"Ош шаары жаңыланып "өхх" деп жаткан экен да. Эми шаарга окшойт экем да деп",- деди өлкө башчысы.

Ошондой эле жолдорду салууда, асфальт басууда дагы техникаларды алып келүү зарылчылыгын белгиледи. Мындан тышкары президент түртүлгөн үйлөрдүн маселесин да чечип берүүнү убадалап, мэрге тизме берүүнү тапшырды.

Маалымат үчүн: 2025-жылы Ош шаарында жалпы 33 көчөнү куруу иштери колго алынган. Республикалык бюджеттин эсебинен 22 чакырымга жакын 11 негизги көчө капиталдык оңдоодон өттү.

Жергиликтүү бюджеттен каржыланып, шаар ичинде дагы 22 көчөдө капиталдык оңдоо иштери жүргүзүлүүдө.

Жалпы 90 пайызга жакын жол асфальтталып, Эгемендүүлүк күнүнө карата элге пайдаланууга берилүүдө.