Кара-Кулжадагы жолдун ачылышында өлкө боюнча 60тан ашуун өндүрүш пайдаланууга берилди

Кечээ, 29-августта президент Садыр Жапаров капиталдык оңдоодон өткөн Өзгөн – Мырза-Аке – Кара-Кулжа жолун ачты жана буга катар онлайн форматта Эгемендүүлүк күнүнө карата өлкө боюнча 60тан ашуун өндүрүш ишканаларын ишке киргизди. Бул тууралуу мамлекет башчысынын басма сөз кызматы билдирди.

Мамлекет башчы өз сөзүндө стратегиялык маанидеги жолдорду, эл аралык коридорлорду, мамлекеттик жана жергиликтүү маанидеги жолдорду салуу максаты коюлганын белгиледи.

“Буга чейин жолдорубуз насыяга, чет элдик компаниялардын жардамы менен салынып келсе, эми жолдордун дээрлик 80 пайызы мамлекеттик бюджеттин эсебинен, ата мекендик ишканалар тарабынан курула баштады. Өлкөбүздүн аймагында көптөгөн жолдор өз милдетин эчак эле ашыкча аткарып, эми жедеп жыртылып, жамап-жаскоого да жарабай калган.

Өлкɵ ичинде автоунаалардын саны арбыган сайын эски жолдорубуз таптакыр жараксыз болуп калган. Өзгөн – Мырза-Аке – Кара-Кулжа жолу дагы мына ошондой жолдордун бири эле", - деди президент.

Белгиленгендей, Өзгөн – Мырза-Аке – Кара-Кулжа жолунун 34 чакырымы капиталдык оңдоодон өтүп, 4 айдын ичинде бүттү.

Президент өлкөбүздүн бир катар аймактарында 67 жаңы өндүрүш ишканаларын онлайн форматта ачты. Долбоорлорду ишке ашыруу үчүн жалпы инвестициянын көлөмү 222,5 милллион долларды түздү, анын 92,5 пайыз ички инвестицияларга жана 7,5 пайыз тышкы инвестицияларга туура келет. Натыйжада беш миңден ашуун жаңы жумуш орундары түзүлөт.

Атап айтканда, жалпы объекттердин ичинен 11 мамлекеттик ишкана жана 56 жеке ишкана болуп саналат.